Fastaem Noa i Stanemap Wan Olta
—blong mekem Wosip long God
Stat long lesen ya, tingting i isi. Be en blong hem, tingting i dip. Lesen ya, i longsaed blong stori blong Noa. Afta bigbigfala ren i draonem olgeta wol, Noa mo famle blong hem oli kamaot long bigfala sip. Oli stanup long drae graon bakegen. Fastaem Noa i wokem wan ston tebol blong mekem sakrefaes long God. Nao long stori ya, Noa i tijim yumi sam samting we i impoten tumas.
Jenesis 8:20-21
20 Nao Noa i wokem wan olta blong mekem wosip long Hae God, mo i tekem ol anamol wetem ol pijin we oli klin long fes blong Hae God, i mekem sakrefaes long olgeta. Hem i tekem wanwan long olgeta evriwan, mo i kilim olgeta, i bonem olgeta we oli bon evriwan long olta ya blong mekem wosip long hem. 21 Mo taem Hae God i harem smel blong olgeta, hem i glad tumas long hem...
Fastok long lesen ya
- Afta bigfala wota i draonem olgeta wol, biaen Noa, mo famle blong hem, mo ol anamol wetem hem, oli bin kamaot long bigfala sip. ?Wanem faswan samting Noa i bin mekem? "Nao Noa i wokem wan olta blong mekem wosip long Hae God..." (Jenesis 8:13-22).
- Hemia wan lesen i stap long faswan samting we Noa i wokem. Noah i kamaot long sip ya, i gohed wantaem i wokem wan ston tebol, mo i mekem sakrefaes se i bonem sam anamol long olta ya blong wosipim Hae God.
1 Wol blong Noa i Nogud we i Nogud
- Bifo, God i bin mekem bigbigfala ren. Nao "olgeta samting ya we i gat laef we oli stap long graon... hem i draonem olgeta evriwan oli ded. Ol man, wetem ol anamol, mo ol naranarafala samting we oli stap wokbaot long graon, mo ol pijin, God i spolem olgeta evriwan... Noa nomo, wetem ol famle blong hem mo olgeta samting we oli stap wetem hem long bigfala sip ya, olgeta ya nomo oli stap laef." (Jenesis 7:21-23).
- Naoia, Noa i nomo gat haos be i gat bigfala sip nomo; i nogat eni garen; i nogat tabu ples wetem olta blong wosip; i nogat plante man blong givhan long hem. Oraet hem i mas stat bakegen blong wokem evri samting we hem i needim. Weswan bambae i mekem wantaem?
- Laef blong yumi maet i foldaon samtaem. Tumas samting blong laef ya i save lus, mo biaen yumi mas stat bakegen blong mekem niufala laef long wol ya. Wanem yumi mas mekem wantaem? Jisas i bin ansarem kwestin ya. Jisas i talem se, "Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala." (Matiu 6:25-34).
- Hemia nao. Trutok blong Jisas ya, i olsem we Noa bifo i mekem finis. Evri dei long laef blong hem God i bin stap faswan. Nao bambae yumi tingbaot Noa ya.
2 Noa i bin Putum God we i stap Faswan
- Baebol i bin talem yumi se, "Nao Noa i wokem wan olta blong mekem wosip long Hae God..." (Jenesis 8:20).
- Olta ya i faswan samting we Noa i bin wokem. Narafala samting i mas wet nomo. Fastaem Noa i wokem wanem i nidim, long kastom blong hem blong mekem wosip long God. Nao i bin mekem sakrafaes we i bonem sam anamol we oli kamaot long sip ya. Noa i bin lukaotem long God fastaem.
- Hemia narafala stori i olsem. Longtaem i pas finis, nao Serubabel, mo ol pipol blong hem, oli harem olsem. Longtaem bifo, enemi i bin smasem bigtaon ya, Jerusalem, i go pisis olgeta. Bigtaon ya, i nomo gat tabu ples blong wosip, i nomo gat garen o haos long hem, i nating nomo. Enemi i bin spolem evri samting. Serubabel mo ol man Isrel oli kambak bakegen long Jerusalem ya blong stanemap bigtaon ya bakegen. Wanem oli wokem fastaem? Olsem Noa bifo, wantaem oli mekem olta blong wosip long Hae God (Esra 3:1-3).
- Plante samting i stap we i impoten long laef blong yumi. Be sapos laef ya i had tumas, yet yumi mas putum faswan ol samting blong God. Sapos laef ya i gat plante trabol long hem, nevamaen yumi no mas mekem God i wet. Yumi mas wokem ol samting blong God wantaem yet. Nao God i save givhan long laef blong yumi
3 Noa i Soemaot Jisas Kraes
- Nao stori blong Noa, i gat wan moa lesen long hem. Noa, i wokem wan olta, mo i bonem ol anamol long hem blong mekem sakrefaes. Samting ya, i gat spesel mining long hem.
- Long taem bifo, ol anamol sakrefaes oli stap mekem pija we i soemaot sakrefaes blong Jisas Kraes gogo Kraes i kam, i ded long kros. Anamol sakrefaes ya, "Hem i pija nomo blong ol tru samting we i stap... i olsem sado nomo blong ol gudgudfala samting, we bambae i kamtru." (Hibrus 10:1-10).
- Kristin wosip long tede, i gat narafala fasin we i pija blong tingtingbak long Kraes. Long fasin ya, yumi no yusum olta mo ol sakrefaes nating, be naoia yumi mekem Lodsapa long fas dei blong wik, blong rimemba mo tingbaot bodi mo blad blong Kraes (1Korin 11:23-26). Sapos yumi ting se Lodsapa ya i impoten tumas, yumi serem tingting blong Noa, mekem se yumi olsem ol pris blong God (Revelesen 1:5-6).
- Hemia nao, olgeta laef blong yu i mas soemaot Kraes. Yu mas traehad blong folem Kraes mekem se i gat nambawan ples long laef mo hat blong yu, olsem Pol i talem se, "Naoia, i no moa mi ya we mi stap laef, be Kraes nomo i stap laef long mi. Mo laef ya we mi stap long hem naoia, mi mi gat from we mi bilif long hem, we hem i Pikinini blong God. Hem i lavem mi, nao i givim laef blong hem, i ded blong sevem mi." (Gelesea 2:20).
Copyright on print