Tanem Sore nao i Kam Hapi
—Lesen long Aesea 53
Lesen ya, i kamaot long Baebol, long Aesea japta 53. Nao sapos yu ting se japter ya i impoten tumas, i bitim ol narafala japta long buk blong Aesea, ale tingting blong yu i stret nomo.
Aesea japta 53 hem i tok blong profet longsaed blong wan man we hem i safa panis blong helpem yumi [mekem se yumi save kam fren blong God]. Hemia nao, man ya i Jisas Kraes.
Aesea i talem se, "Nao yumi lukluk nogud long hem, yumi tanem baksaed long hem. Hem i wan man we i harem nogud plante taem, mo i savegud olgeta samting we i stap mekem man i harem nogud." (Aesea 53:3a, BBR).
Hao nao yumi save we Aesea japta 53 i tokbaot Jisas Kraes? Wan man blong Itiopia, hem i namba wan man blong lukaot long mane blong kwin blong Itiopia. Hem i stap ridim japta ya, Aesea 53. Hem i askem Filip, “Huia man ya we profet Aesea i tokbaot?” Nao Filip i prij long hem lonsaed blong Jisas. (Wok 8:26-40)
Aesea 53 —i tokbaot sore we i tanem nao i Kam Hapi. I gat trifala rod we bambae samting ya i kam tru.
1 Jisas i ded finis, be nao i tanem se i stap toktok long God oltaem from yumi.
Jisas i save stretem trabol mekem se bambae yumi kam fren blong God, from hem i save tekemaot ol sin blong yumi from ded blong Jisas. Afta ded ya, Jisas i laef bakegen mo i go antap blong prea oltaem long God from yumi.
Sore blong Jisas: Nao yumi lukluk nogud long hem, yumi tanem baksaed long hem. Hem i wan man we i harem nogud plante taem, mo i savegud olgeta samting we i stap mekem man i harem nogud. (Aesea 53:3a, BBR).
Hapi blong Jisas: "Man blong wok blong mi bambae i finisimgud wok blong hem, mo mi bambae mi leftemap nem blong hem i go antap, mo ol man bambae oli ona gud long hem, nao nem blong hem bambae i hae we i hae." (Aesea 52:13 BBR).
Jisas i mekem yumi fren blong God
Kraes i bin safa mo hem i ded mekem se yumi save joenem ol fren blong God. God i save tekemaot sin blong yumi. Sin ya i bin blokem yumi be nao yumi no moa mas stap longwe nogat. Yumi save kam klosap from God (1Jon 2:1-2).
"Ol pikinini blong mi. Mi mi stap raetem ol tok ya i kam long yufala blong blokem yufala, blong yufala i no mekem sin. Be sipos wan long yumi mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol." (1Jon 2:1-2 BBR).
Jisas i stap prea long God oltaem from yumi.
Kraes i girap, i laef bakegen. Biaen hem i go long Heven mo laef blong hem i no save finis. God i mekem hem i Hae Pris we hem oltaem i toktok long God blong helpem yumi mo stretem yumi mekem se yumi rere blong pas long kot blong God (Rom 8:34, Hibrus 7:25-27).
"I no gat wan man nating i save jajem yumi, se bambae yumi mas panis, from we Jisas Kraes ya we i ded, mo we biaen God i mekem hem i laef bakegen, hem i stap sidaon long raet saed blong God, i stap toktok long God oltaem from yumi." (Romans 8:34 NKJV).
"Nao from samting ya, hem i save sevem olgeta we oli joen long hem blong kam long God, i stat naoia, gogo i no save finis, from we hem bambae i laef oltaem, mo bambae i stanap oltaem long fes blong God, blong prea from olgeta." (Hibrus 7:25 BBR).
"From samting ya, hem nao i prapa Hae Pris we i stret gud blong givhan long yumi. Hem i wan tabu man, we i no mekem sam samting nogud, mo i no gat sam samting we i spolem hem. Hem i narafala olgeta long ol man nogud, mo God i leftemap hem finis, i hae moa long olgeta long heven." (Hibrus 7:26 BBR).
"Loa blong Moses i stap putumap ol man blong oli hae pris, we olgeta oli no gat paoa, oli save mekem sin. Be promes ya blong God we i kam biaen long Loa ya, mo we God i talem nem blong hem blong mekem i strong, promes ya i putumap Pikinini ya blong hem, we hem i mekem hem i stret gud finis, blong i stap olsem, gogo i no save finis." (Hibrus 7:28 BBR).
2 Yumi sore from sin finis, be nao yumi tanem, se God i forgivim yumi.
Sapos tingting blong yumi stikim yumi from sin, be God i save tanem tingting ya, from hem i gat rod blong jenis, se i nomo jajem yumi be i fogivim mo stretem yumi.
"Yumi evriwan, yumi olsem ol sipsip we oli lus finis, yumi evriwan i stap folem ol rod blong yumi wanwan. Be Hae God i putum ol sin blong yumi evriwan i go long man ya nomo." (Aesea 53:6, BBR).
"Oltaem long laef blong hem, hem i stap harem nogud, be naoia, bambae hem i save harem gud. Bambae hem i save se hem i stap harem nogud tumas, be i no blong nating. Man blong wok ya blong mi, hem i stret olgeta. Hem bambae i karem ol sin blong plante man, mo from ol samting we hem i mekem, mi bambae mi fogivim olgeta, mi tekemaot ol sin blong olgeta." (Aesea 53:11, BBR).
"God i givim Jisas ya we i Masta* blong yumi, blong hem i ded from ol sin blong yumi, mo blong i laef bakegen, blong mekem se yumi kam stret man long fes blong God. Mo sipos yumi bilif long God, se hem i mekem Jisas i laef bakegen, bambae God i luk yumi se yumi stret man long fes blong hem." (Rom 4:24-25, BBR).
3 Yumi sore from ol hadtaem finis, be nao yumi tanem, se yumi hapi from bambae yumi go long Heven.
God i jenisem traboltaem, i putum hapi tingting we i tekem ples blong sore.
"Olgeta samting we i stap mekem yumi harem nogud, hem i karem olgeta evriwan. Ol sobodi we hem i karem, hemia ol sobodi blong yumi." (Aesea 53:4).
"Ol samting ya i kamaot olsem, blong mekem tok ya i kamtru we Profet Aesea i bin talemaot bifo, we i talem se, 'Hem i tekem ol sik blong yumi, mo i karem ol sobodi blong yumi." (Matiu 8:17).
Matiu i tokbaot taem we Jisas i bin mekem pipol we oli harem nogud nao oli nomo sik, oli harem gud. Matiu i talem se Jisas i mekem tok blong Profet Aesea i kamtru se Jisas i karem soa mo sik blong man (Matiu 8:17, Aesea 53:4).
Long tede, Jisas i stap helpem yumi stanap strong long ol hadtaem. Hem i givim pis long yumi nao yumi save we afta laef blong trabol ya, bambae yumi kasem bigfala laet long Heven. Hemia Heven i stap oltaem i nogat en long hem (Rom 8:18, Revelesen 21:4).
"Long tingting blong mi, taem we yumi stap tingbaot gudfala laef ya blong heven we bambae i save kamtru long yumi, ol samting ya we naoia oli stap mekem yumi harem nogud tumas, oli olsem nating nomo." (Rom 8:18, BBR).
"Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta." (Revelesen 21:4, BBR).
"Bakegen, profet i talemaot we Hae God i talem se, 'I plan blong mi se man ya i mas harem nogud. Ded blong hem i wan sakrefaes blong tekemaot ol sin blong ol man. Nao bambae hem i save luk olgeta we bambae oli kamaot biaen long hem. Bambae hem i laef longtaem, mo long samting ya we hem i mekem, plan blong mi bambae i kamtru.'" (Aesea 53:10b, BBR).
Lastok hemia trifala stamba poen blong lesen ya.
- Jisas i ded finis, be nao i tanem se i stap toktok long God oltaem from yumi
- Yumi sore from sin finis, be nao yumi tanem, se God i forgivim yumi.
- Yumi sore from ol hadtaem finis, be nao yumi tanem, se yumi glad tumas from bambae yumi go long Heven.-
"Bambae yufala i harem nogud tumas, be biaen, bambae yufala i harem gud, yufala i glad we i glad." (John 16:20).