Trifala Spesel Hil
—we i stap long Baebol
Baebol i tokbaot sam hil we i stap long ol defren ples. Long disfala lesen, bambae yumi lukluk long trifala bigfala hil se, Maonten Ararat, Maonten Saenae, mo Maonten Saeon.
Naoia yumi no lukluk long bigfala hil nomo. Yumi lukluk tu long wanem ol spesel samting i bin hapen klosap long trifala. Long Ararat, God i bin sevem Noa mo famli blong hem. Long Saenae ol man oli bin mekem sakrefaes long giaman god. Long Saeon God i bin mekem ol gudgudfala promes.
1 Maonten Ararat
SALVESEN. Wan bigbigfala wota bifo i bin draonem olgeta wol mo olgeta man mo olgeta animol. Be long bigbigfala bot we Noa i bin wokem, naoia God i bin sevem sam blong ol animol, mo i sevem famli blong Noa. Afta wota i go daon, mo graon i kam drae bakagen, eitfala we i stap long bigbigfala bot eitfala ya i save kamaot long bot (Jenesis 8:1-4).
SAKREFAES. Dei ya, i stat blong niufala laef blong ol man. Nao eitfala man we i kamaot long bot ya, eitfala i got janis blong sakem fasin nogud mo mekem laef blong eitfala i folem gladhat blong God mo lav blong trutok blong God. Noa i bin savegud samting ya, mo wantaem i mekem wan olta (tabu tebel blong ston) mo i bonem sakrefaes long God long olta ya. (Jenesis 8:20).
PROMES. Nao God i promesem Noa se, no moa neva God i draonem olgeta wol wetem bigbigfala wota bakegen. Biaen God i putum renbo long skae nao hem i gat mining blong promes ya (Jenesis 9:11-13).
2 Maonten Saenae
SALVESEN. Ol laen blong Israel (Jakob) oli stap slev blong Ijip long 400 yia gogo Moses i lidim olgeta aot long Ijip, mo oli gokros Redsi, mo oli wokbaot long draeples we i no gat man long hem. God i sevem olgeta pipol ya blong hem se oli no moa stap slev. Nao oli kasem Saenae blong spel mo mekem kam long ples ya. (Eksodas 31:18).
SAKREFAES. Moses i bin klaemap hil Saenae i go antap. Nao Moses i mitim God, mo God i givim Moses tenkommanmen we God i raetemdaon finis long tufala ston. Be ol man we oli stap daon wetem Eron, oli wokem wan aedol blong gold, hemia i olsem wan pikinini blong buluk. Nao oli wosipim aedol ya, mo oli bonem sakrefaes long hem. Oli talem se aedol ya i bin tekemaot olgeta long Ijip mo sevem olgeta (Eksodas 32:1-7).
PROMES. God i panisim fasin nogud ya. Be God i no fogetem promes we i bin mekem long trifala bubu bifo, hemia Ebraham, Aesak, mo Jakob. God i promesem trifala ya we bambae i givim long ol pikinini blong trifala ya plante gudfala graon we i stap longsaed Reva Jodan (Eksodas 33:1)
3 Maonten Saeon
SALVESEN. Saeon i nem blong bigfala hil we i stap long Jerusalem. Nem ya i blong Jerusalem tu mo graon we i raonem Jerusalem. Kantri mo nesen blong Kraes we i King long hem, i kamaot fastaem long Jerusalem (Saeon), nao afta i go olbaot long ogeta wol, mo i soemaot trutok we Kraes i save fogivim olgeta sin mo givim laef we i no save finis (Joel 2:32).
SAKREFAES. Long Jerusalem (Saeon) Jisas Pikinini blong God, i go long kot finis blong bambae i mas ded long wan kros, nao sam disaepol blong hem oli berem hem. Be i laef bakagen mo i soemaot long plante man, we oli luk hem, se i no moa ded. (Wok 1:3). Ded blong hem i mekem wan sakrefaes nomo blong tekemaot olgeta sin (Hibrus 9:27-28).
PROMES. Long Jerusalem (Saeon) Jisas i bin go antap long Heven. Ol disaepol blong hem oli luk hem [gogo wan klaod i kavremap Jisas]. Wan enjel i talem se bambae Jisas i kambak bakagen long sem fasin we oli luk hem i go (Wok 1:9-11). Maonten Saeon hem i symbol blong bigtaon blong God long Heven. Nao ol man we Jisas i seven olgeta, bambae oli stap oltaem gogo i no save finis (Hibrus 12:22-24).
